Friday, July 14, 2006

War deg deg ah Markii ugu horreysay 11 sano kadib oo maanta wefdi caalami ah ay ka soo degeen kana duuleen garoonka dayuuradaha ee Muqdisho & dadkii i

Waxaa maanta soo gaaray magaalada Muqdisho wefdi ka socda J/Carabta, uuna hor-kacayey wakiilka J/Carbta u qaabilsan arrimaha Soomaaliya Cabdalla Mubaarak, una yimid magaalada Muqdisho in ay kaxeeyaan wefdi ka socday midowga maxkamadaha shareecada Islaamka oo la filayey in ay maanta ka dhoofaan magaalada Muqdisho, waxaana wefdiga maanta markii ay soo gaareen magaalada Muqdisho ay kormeero kala duwan ku tageen gobo muhiim ah sida dekadda & garoonka dayuuradaha.

Dayuuradii siday wefdiga oo ka soo degtay garoonka Cisaley, ayaa mar kale u soo duushay garoonka caalamiga ah ee dayuurada oo muddo 11 sano ah aysan soo caga dhigan wax dayuurad ah, una xirnaa khilaafkii u dhexeeyey kooxaha hubeysan ee Muqdisho.

C/casiis C/wahaab oo ka mid ahaa weriyeyaashii ku sugnaa garoonka dayuuradaha ayaa sheegay in dadweynihii isugu soo tegay halkaasi & culumaa’udiinka midowga maxaakiimta ee halkaa ku sugnaa in gudaha garoonka ay ku tukadeen SALAATUL SHUKRI, waxaana dadweynihii isugu soo baxay garoonka dayuurada wejigooda ka muuqatay farxad weyn & dareen wadaniyadeed, waxaana dadka qaarkii ay ku heesayeen heestii “Maanta maanta maanta waa maalin weyne maanta”

Maalmihii u danbeeyey ayaa laga shaqeynayey waddada “run way-ga” ah ee ay dayuuraduhu ka haadaan, iyadoo ay tahay markii ugu horreysay muddo 11 sano ah oo garoonkaasi ay dayuuradi soo caga dhigato ama ka duusho, waxaana tallaabadan markii ay maqleen si weyn u soo dhoweeyey dadka ku dhaqan magaalada Muqdisho oo ku tilmaamay in ay tahay arrin loo riyaaqo haddii ay midowga maxaakiimta Islaamka ku guuleystaan in ay furaan ilaha muhiimka ah.

Xigasho: dayniile.com

No comments: